انا ياجماعة نفسى اصاحب بنت تكون صاحبة طريق , صاحبة مشوار العمر يكون ليا انتيم ..............

عجبتنى بسمة اوى فعلا اسم على مسمى دايما بتضحك  , شعله من النشاط مش فارقة معاها حاجة زى العربية هيربى بالظبط .

بسمة

بسمة او zigzag  وجهان لعملة واحدة .انا مش عارفة ايه المغزى من ان هى تمشى zigzag  فى الشارع ومش اى zigzag  ده من اقصى اليمين الى اقصى الشمال ومش فارقة معاها تخبط حد , تلزق فى حيطه ومينفعش تغير مسارها لاى سبب من الاسباب .دمغها عاملة زى طبق الجيلى اللى لسة طالع من التلاجة.

مرة اتخنقت مع مرات البواب وانا واقفة ومش فاهمة اى حاجة        ( يعنى شفت بعينى محدش قالى ) ولما حاولت اهدى النفوس        و اعرف اية الحكاية عرفت ان يعينى (يعينى بجد ) على الغلبانة الست ام محمد عمالة بتحاول تقنع  بسمة  ان اللى هى بتعملة ده ممكن يعملها مشاكل مع سكان العماره وخاصة مع السيد المحترم والد بسمة ولما حاولت استفسر على الحكاية المره والغريبة معا  عرفت ان بسمة خدت المقشة وبدات تكنس العمارة من الدور ال13 لغاية الدور التانى بس للاسف الست ام محمد شافتها قبل ماتكمل  ومن كتر الاستغراب والدهشة والذهول كانهم عملوا كوكتيل غريب او سندوتش الباتنجان بالجبنة الجميل اللى كل الناس بتستغرب ان هى بتاكله .

اين كان المهم جاء دورى المؤثر والمستفز معا ,لما سالت مدام ام محمد هو حضرتك زعلانة ليه ياطنط علشان هى مكملتش السلم ولا علشان خدت المقشة من حضرتك ؟

_ فى هذة اللحظة لم يسع للغلبانة غير الصمت ,بس انا لو منها اقول حاجة واحدة بس يالا يا بت انتى وهى  امشى من هنا ان ماجبتش الحج ابو محمد وجريوا ورانا بالمقشات لغاية اخر الشارع !!!!!!!!!!!!!!

وفى هذة اللحظة ادركت ان انا كمان 2/1 سوا .

·      اتصلت عليها تانى يوم  اطمئن عليها وفوجئت بانها فى المستشفى لما مامتها ردت عليا والاغرب ردى عليها :

- والله يا طنط ماليش دعوة .

هو فى ايه هو ابو محمد وام محمد وعيالهم اتلموا عليها وضربوها تحت السلم !!!!!!!!!!!!!

المهم رحت لها جرى ........

خير ايه اللى حصل ؟ مالك متشعلقة فى السما كده ومربوطة من رجليك وايديك ؟

ولم استطع فعل شىء غير السخسخة والضحك المتواصل (كانت بتفكرنى بطلعت زكريا فى فيلم "غبى منه فيه" ) .

فيه ايه يابنتى ايه اللى حصل ؟

-        اصل انا وقعت من البلكونة وانا بعلق زينة رمضان .

طب كل سنة وانتى طيبة واعاده الله عليكى بكل خير .........

-        مواقفها عجيبة  

مره راحت  فتحت حنفية الكولدير اللى فى الشارع ووقفت جنبها .

ليه ؟؟؟؟؟؟؟؟؟؟؟؟؟

اصل انا بحب اسمع واستمتع بخرير المياه .

خرير ايه ؟؟؟؟؟؟؟انتى فاكرة نفسك فى سنغ نافورة

-        ومره تانية كانت هتعملى مشكلة فى الشارع ,عربية فيها اقفاص فراخ عايزين نعدى والسواق كان بطئ .

وباعلى صوت يالا يا معلم فرخة يا معلم قفص  اتحرك .

-عيب يا حبيبتى الراجل هينزل يبهدلنا .

فعلا نص سوا .

لم استطع ان اختم بكلمات افضل من كلمات اغنية حسين الجسيمى  فاقول :

" انا ليا طلب عندكوا والنبى علشانى فى حد معاه تليفون دكتور نفسانى " .

وانتظرونى  مع شخصية جديدة ,,