طالب نص سوا هى دى حالتنا احنا كدة طلبه مخدناش وقتنا فى النضج بمعنى اصح احنى اتلسقنا …………..
هى ليه وزارة التربية والتعليم والاهالى عملت فينا كدة ؟
هما عايزين يفرحوا بينا بدرى ويطلعوا دفعات نص سوا .
معظمنا دخلنا ابتدائى عندنا 5 سنين ونص واحتمال اقل وخدنا 5 سنين ابتدائى يعنى دفعة خمسة وخميسة علشان الحسد وكدة يعنى (ايوه احنا الدفعة بتاعة 5 سنين)
وفجاه لقينا نفسنا فى اعدادى ومن هنا وضعت لنا القوانين الصارمه واحنا لسة عندنا 10 سنة بس .
متجريش فى الشارع انتوا بقيتوا فى اعدادى , ماتنطاطيش ,اوعى تضحكى ,ما تكلميش, متاكليش فى الشارع انتوا كبرتوا !
فعلا كبرنا بس قبل الاوان .
واى حاجة غير كدة تبقى ميصحش .
خلاص كفايه مقدمة هبتدى الحكايه (الحكايات) بسرد ووصف لشخصيات قبلتها خلال مسيرة تعليمى تدل على مدى النضج اللى احنا فيه .
الشخصيات من وحى الخيال ممتزجة بالواقع .
سارة
المشهد :
احدى قاعات الكلية يجتمع بها الطلبة للمذاكرة مع اقتراب الامتحانات والتى نادرا ماتكون فارغة فى هذا الوقت من السنة .
طالبة 1: Saso,could u give me some papers please ?
سارة :Sure
طالبة 1: thnx , BTW ذوقك حلو اوى فى اختيار الاغانى .
سارة : اه ما انا عارفة .
طالبة 1 : انا بموووووت فى سيلين ديون .
بعد مرور وقت على الانتهاء من اغنية سيلين ديون وذهاب الفتاه التى كانت بتموووت فيها وبداية
الموال الشعبى الاصيل المتاصل فى جميع الميكروباصات المصرية " انا مش عارفنى " .
انا : والنبى يا سارة وطى الموبايل او حطى الHEAD PHONE عشان انا مش عارفة اركز .
تنظر لى بكل استنكار واحتكار دون الرد او حتى النطق باى كلمة وكانها لم تسمع شيئا . ولا اعرف لماذا انبت ضميرى للحظة وسالته ماذا كنت بفاعلة ؟ وما سيكون مصيرى الماسوف ؟ هل سانفى فى تشريل نوبيل ؟ او القدر سيكون رحيما بى واسجن مدى الحياة فى سجن ابو غريب ؟
ولكن السؤال الاهم الان ماذا فعلت؟؟؟؟ ماذا فعلت لكل هذا ؟ هل من مجيب ؟
وفى لحظة كان القدر قد تذكر مافعلتة من خيرات فى ماضيى وتذكرت اخيرا ماذا فعلت !
لم اقل الكلمة السحرية نعم لم اقلها !!!!!!!!!
بس انا قلت والنبى .........
مش والنبى ياجماعة = PLEASE بلغة الخواجات بس المشكلة ان الكلمة السحرية فى قاموس سارة لم تكن PLEASE او والنبى , علشان خاطرى , وحياة الغالية ,علشان خاطر ربنا (وخد عندك من ده كتير ) او اى كلمة نعبر فيها عن التوسل .
انما كانت دلع لاسمها سارة انا مش عارفة ايه الحكاية دى والغريبة ان اننا مش عارفة ادلعها اقول لها ايه ؟
سوسو؟
لا محدش يقولى سوسو.
صاصا؟
دا اسم ولادى خالص.
سيسى ؟
انتى بتهزرى انتى فاكرانى ايه؟
كده مفضلش الا ساسو وصرصارة .
وساسو ده مش عارفة لية بيفكرنى بالبيرسول وطبعا مش ذوقيا انى اقول صرصارة مع انهم ليهم علاقة ببعض .
وفى هذة اللحظة من الترقب والتاهب والانتظار والتفكير كانت اعين صديقتنا صغيرة الحجم فى متابعه للموقف وخوف عميق متمنية من العزيز الجليل انتهاء المشدة العسكرية باطفاء الموبايل حتى ينعم الجميع بالسلام وبدون اى خسائر مادية او فقدان فى الارواح .
طول عمرى نفسى اعرف هى ليه بتعمل كدة فى العيال ؟ دايما خايفين منها وعاملين لها الف حساب ؟
دائما سارة كانت تعانى مشاكل فى زيادة وزنها التى (من وجهة نظرها ) يسبب لها احراج وكانت دائما ما تستعوض (ايوة تستعوض ) ده بالنونوه والسوسوه والسهوكه قال يعنى لما هترفع من صوتها هيزيح من جسمها .
ولا استطيع ان انسى ان هى مش بتكلم عن اى حاجة ليها اهمية فى الحياة لا دراسيا ولا علميا ولا اجتماعيا ولا حاجة !!!!!!!!!! ولغاية دلوقتى طبيعى جدا ان هى تكلم عن عرايس باربى الجديدة او الحلقة اللى فاتت من مسلسل هانا مونتانا وبالطبع على الجميع الانصات .
وغالبا ما يوقعنى لسانى الباحث عن الحق فى مشاكل معها واجد نفسى فى موضعين :
1- انى ادادى وادلع واهشك وكمان اشخلع ومش بعيد اروح معاها اكل واشرب واحمى وافلى مش بعييد كل حاجة ممكنة . واجد نفسى احمل اطنان ورا اطنان قال يعنى الحلم هيرجع لنا........ واللى هشيله اليوم اكيد بكره هيوجع ضهرنا ......... جايز ظلام الليل ينزاح وارتاح منها بقى .
ياخرب عقلك ياسارة خلتينى اغير كلمات اغنية من اعرق الاغانى العربية (مع الاعتذار الشديد للاغنية ) .
2- نرجع لمرجعنا الموضع التانى "ان التزم الصمت " حتى تنتهى الزوبعة وابعد نفسى عن قال وقيل
وادخل نفسى فى مشاحنات مع شخصية ترفض الاصغاء .
ومن ناحية تانية بقول خسارة انى اتعب نفسى واهاتى معاها .
انا نفسى اساعدها واقولها تحب نفسها بس مش عارفة ازاى بمعنى تانى تكون نفسها على راى احمد مكى (ومتحاولش تبقى حد تانى تانى غير نفسك خليك واثق فى نفسك) مش هقول انى خبيرة فى العلاقات الانسانية او التنمية البشرية بس اصلا احنا فى الجامعة لية ؟ مش عشان نتعلم مش من الكتب بس ولكن من كل مواقف الحياة اللى حولينا . واخيرا اطبق المثل الاصيل المتاصل فى كينونتى , (خليك على هواك لغاية مايجى اللى يديك على افاك ) وانسحب انا المنهزمة جهرا المنتصرة سرا من النزاع ...............
وانتظرونى مع شخصية جديدة
ليست هناك تعليقات:
إرسال تعليق